政情：刺激生育 蔣麗芸獻房策
剛公布嘅人口政策諮詢文件顯示本港女性遲婚情況愈來愈嚴重，女性現時初婚年齡中位數為二十八點九歲，比三十年前足足遲咗五歲，而每名婦女只肯平均生育一點二個嬰兒。本港生育率偏低已經係不爭嘅事實，但各界對於點樣鼓勵市民生育仍然未有一致睇法，立法會議員蔣麗芸（Ann）就建議政府容許民間開多啲時鐘酒店，實行鼓勵市民「開房」時順便開枝散葉。吓，乜男女「開房」係為咗生育？
開房等於「造人」？
人口政策諮詢文件中提出改善職場環境、增加託兒服務等「間接」方式鼓勵市民生育，被外界質疑成效不大。早前有報道話港人性生活空間不足，直接影響生育意欲，阿Ann尋日同傳媒聚會時就討論到呢個問題，佢話去酒店「開房」就可以確保有足夠空間，但當佢知道開房勝地九龍塘理想酒店都因為不敵地產霸權無奈結業時，就話佢嘅九龍西選區內有唔少時鐘酒店，當中尤以佐敦區最多。
阿Ann建議，政府倒不如向部分無牌經營嘅時鐘酒店發出正式牌照，等人可以光明正大地光顧時鐘酒店「造人」，從而增加生育率喎。莫講話時下男女「開房」唔會有生育念頭，就算真係成功開枝散葉，屋企連性生活空間都唔夠，又點樣有空間畀仔女成長呢？莫非去時鐘酒店養大啲仔女？
小孩做政府債主
阿Ann發表完增加生育率嘅偉論後，又大嘆有啲夫婦因為養小朋友太貴而決定唔生，佢於是又向政府獻計，建議推行「嬰兒基金」。
「嬰兒基金」係幫小朋友由出世嗰日起儲錢，新年時逗嘅利是要統統放晒落基金，而政府就會向小朋友「發債」，徵用佢哋嘅利是錢作為興建隧道同商場嘅資金，令小朋友成為政府嘅債主。阿Ann之後愈講愈起勁，話橫掂小朋友大個之後都會用到以上嘅設施，政府咁做可以話係「為孩子們的未來而設（build their future）」喎！阿Ann話呢啲構思已經喺佢腦海中形成一段時間，待時機成熟後就會向政府提出建議。唔知大家又點睇呢？