中環出更：逼阿基諾道歉 施榮懷打「福建牌」
菲律賓挾持人質事件發生至今，總統阿基諾三世仍未肯向受害者家屬道歉，有港人建議抵制菲傭來港打工、停止菲港經貿合作，藉以癱瘓菲國經濟。中華廠商聯合會會長施榮懷（Irons）話，阿基諾必須為慘劇道歉，但就無必要斷絕菲港往來。佢話，菲國有唔少福建人定居，好多都對菲政府處理慘劇嘅態度好不滿，建議佢哋凝聚力量，向菲政府施壓，迫使阿基諾道歉。
聚居菲國 發聲更奏效
Irons話，菲律賓多年前已有唔少福建人聚居，落地生根之餘仲促進當地經濟，對菲國有唔少貢獻，所以若果由當地華人發聲，效果應該比香港市民發聲好得多。至於抵制菲傭來港，Irons話屋企本身都請咗兩個菲傭「姐姐」，服務咗佢哋一家七、八年，合約都續咗幾次，唔覺得有需要炒佢哋魷魚。
講開又講，Irons月前剛剛獲選為賽馬會遴選委員，佢感到好高興，事關佢同爸爸施子清及幾兄弟都好鍾意賽馬喎。
卓妮