中環出更：金刀梁談生死百無禁忌
全港首間以家庭模式經營、專為晚晴病人而設嘅寧養中心「善寧之家」，前日喺沙田亞公角山道嘅地盤正式動工。財政司司長曾俊華、善寧會執行委員會主席王紹強（Raymond）、榮譽會長梁智鴻（金刀梁）、賽馬會董事葉澍堃等齊齊揸起泥鏟，主持動土儀式。喺醫學界服務多年嘅金刀梁見盡生死，佢坦言生老病死係人生嘅一部分，冇必要避談，百無禁忌。
金刀梁話，以前中國人敬畏鬼神，但現代人已經唔再怕講生死，唔少人仲會預先買定墓地、骨灰龕位添。
王紹強指寧養中心意義大
咁佢自己又有冇買定呢？金刀梁就笑笑口話：「未呀，啲（墓）地貴呀！」佢胞弟梁智仁日前獲委任為下屆醫院管理局主席，唔知金刀梁作為前主席有冇同弟弟溝通吓呢？佢就耍手擰頭話：「我都離開咗咁耐啦，每個人都有自己作風，唔干涉對方！」但佢話久唔久都有同弟弟食飯嘅。
Raymond就話，善寧會二十年前已成立「白普理寧養中心」，今次興建呢項新設施，目的係讓臨終嘅病者同家屬有私人空間共處，打開心窗講心底話。佢憶述，過往曾有女病人喺該中心舉行婚禮，又有畫家病者喺嗰度完成一場畫展，所以好高興可以替佢哋圓夢。
善寧之家樓高四層、佔地五千平方米，由賽馬會慈善信託基金撥款一億七千多萬港元捐建，設有三十間設備完善嘅套房，每月房租大約三萬港元，預料將於二○一五年底竣工。
卓妮