政情：馬景煊睇好港百貨業
舖租升、難請人，但香港老牌百貨店先施就愈戰愈強。日前先施副主席兼行政總裁馬景煊（Philip）現身一個活動時話，佢哋啱啱喺旺角瓊華中心開咗間五層嘅先施百貨，嚟緊仲會喺銅鑼灣同中環黃金地段開多兩間新店。佢認為香港「購物天堂」嘅地位未變，百貨絕對有得做喎。
Philip坦言，公司冇賣高級名牌、名錶、奶粉，所以主要客源未必係個人遊，但佢強調公司已有一百三十年歷史，定位一直係「香港人嘅百貨公司」，每一款貨品都係由員工親自採購，希望留住精明嘅本地消費者。
為咗吸引年輕人，Philip於店內加設香薰，將公司標誌嘅字體「瘦身」成細楷及改顏色，並引入韓國潮流服裝，務求符合年輕人品味。
作為家族第三代揸Fit人，Philip除咗專注工作，仲好注重健康，佢話最近一年愛上游水Keep Fit，每次游完食番半件三文治醫肚，難怪佢着起西裝，一啲肚腩都冇。