區議會種票兩年前發生，警方同廉政公署都查得七七八八，但係尋日立法會開政制事務委員會，傾政府建議修例取消虛報地址罪行嘅檢控期限，咁樣就辣着咗議員蔣麗芸（Ann）。
阿Ann話，唔少人登記咗做選民，但係唔記得搬屋之後更改地址，就畀人話種票，嚇到啲市民唔敢登記做選民，仲話「你依家係有把刀，得閒睇你邊個唔順眼，就檢查你過去幾個月之內有冇改地址，唔喜歡你邊個就拉，告你刑事罪，質你坐六個月監」。
政制及內地事務局局長譚志源聽完，都好禮貌咁糾正佢，話其實依家修例係針對虛假陳述，而唔係無更新地址，叫佢唔好攪亂。仲有，其實睇番資料，咁多單種票案件，最高都只係判四個月監，而無阿Ann所講嘅六個月咁多。
點知阿Ann都係唔滿意，又唉聲嘆氣話政府對佢嘅問題無答案。而佢嘅黨友、委員會主席譚耀宗（譚Sir）都頂佢唔順，笑佢「即係你自己理唔理解得到」，一句就K.O咗阿Ann，阿Ann先至肯收口唔再糾纏落去。