政情：三散人拒埋政黨堆
立法會新近復會，各黨派及獨立議員紛紛歸位各自各精彩，未見有任何整合或異動，但其實喺剛過去嘅漫長暑假當中，建制派內部曾經出現多輪獨立議員爭奪戰。被外界歸納為「三散人」嘅旅遊界姚思榮，建築、測量及都市規劃界謝偉銓（Tony）同保險界陳健波向來非常搶手，唔少建制黨派都力邀過佢哋加盟。不過佢哋諗過度過後，認為無論加盟任何現有建制派政團都未必對爭取連任有利，加上泊錯碼頭可能仲會累到佢哋流失選票，所以先決定繼續維持自由身。
新民黨經民聯力邀「銓波」
去年九月立法會選舉結束後，建制派曾經出現一輪獨立議員爭奪戰，其中雙雙損兵折將嘅經濟動力同專業會議合組成為經民聯，「五散人」失去兩名成員後，亦邀得新血加盟變成「四散人」。據知新民黨同經民聯都有向Tony同陳健波摸底，查探兩人入黨意向，當中尤其以經民聯最為積極，皆因佢哋諗住兩位「梁粉」加盟後可以「溝淡唐營色彩」。
面對兩黨極力游說，兩人喺復會後都有相約坐低認真討論是否強勢入黨，不過經過一番討論後都係決定暫時按兵不動維持獨立身份。Tony透露，兩黨先後搵過佢哋幾次，個別黨派更派人連番接觸佢，又同佢講話入黨後會有好多支援，唔使一個人睇晒所有政策咁辛苦。雖然對方「三顧草廬」猛咁邀請，但Tony仍然不為所動，寧願繼續「單身」唔埋堆。
姚思榮指入建制派不利
至於姚思榮，據了解，自由黨同經民聯都曾經力邀佢加盟，而部分支持姚思榮嘅資深旅遊界人士，亦曾建議佢揀番個政團埋堆，免得喺議會內單打獨鬥。姚思榮嘅意向好堅定，佢考慮過後，覺得加入現有建制派政團，不但幫唔到佢喺業界加分，反而會招來麻煩同爭議。姚思榮來自中國旅行社，佢話外界雖然將佢歸納為中字派，但大部分旅遊界選民都唔鍾意太「左」，所以都係決定每個禮拜三朝早一齊食早餐交流吓就算。當然，作為議員，收料都係重要嘅。