中環出更：立會議員櫈 啱肥唔啱瘦
要搵張舒服嘅開會椅，唔通真係咁難？當年立法會舊大樓會議廳嘅議員座椅經常畀議員話唔舒服，點知搬嚟新大樓後，唔少議員坐到腰痛，仲搞到要睇醫生。法律界郭榮鏗（Dennis）仲痛到要睇脊醫，仲要用儀器「鑽」番鬆啲肌肉添。其實投訴新座椅唔舒服嘅都係高高瘦瘦嘅議員，唔通呢張櫈淨係啱肥人坐﹖
立法會搬去新大樓時，秘書處特登搵咗當時嘅行政管理委員會成員黃定光、同埋議員黃容根等有「分量」議員去試櫈，務求令議員坐得舒舒服服，故此即使有「肥峰」之稱嘅新議員張華峰都對依家張櫈幾滿意。
郭榮鏗痛到睇脊醫
不過似乎新座椅滿足唔到所有議員，好似Dennis咁，就因為早前排拉布時坐得多，搞到條腰痛到郁唔到，搞到要睇脊醫。而議員蔣麗芸同何俊賢亦都成日話張櫈坐得唔舒服，頂唔順要行出會議廳舒展筋骨。咁啱得咁蹺，投訴新座椅嘅都係高高瘦瘦嘅議員，睇嚟立法會如果再換議員座椅要搵齊高矮肥瘦嘅議員去試坐至得喇。
卓妮