中環出更：黃志祥買耳筒 唔怕嘈親人
政府使出「辣招」調控樓市後，買家觀望心態濃厚，樓市成交亦驟降。早前由信和集團牽頭嘅大埔白石角新樓盤開售，賣樓成績唔錯，連港區全國人大王庭聰都入市幫待嫁嘅囡囡置業。難怪信和主席黃志祥（Robert）心情靚靚，早幾日食完午飯後去中環一間影音店，火速用八百元買咗個歐洲名牌無線耳筒，佢話打算喺房間睇電視時用喎。
當日下午大約兩點十分，着住西裝嘅Robert一個人現身中環太子大廈，直入二樓一間影音店，專心揀耳筒試戴。佢好快就睇中一個銀黑色嘅無線耳筒，店員趨前耐心講解產品特色，睇嚟個耳筒幾啱Robert心水，售價八百元亦唔算好貴，所以佢好爽快拍板，畀咗錢後拎住「新歡」離去。
喺房睇電視用
卓妮上前同佢打招呼，Robert保持燦爛笑容及禮貌，心情好好。問佢近排忙啲乜嘢？佢話忙緊科學園附近白石角嘅樓盤。咁買耳筒會點用？Robert笑笑口話，買嚟喺房間睇電視時用，靜啲喎！咦？唔通佢怕嘈住老婆瞓覺？Robert笑騎騎，冇回答，跟住佢就落樓下，等座駕離去。
呢款無線耳筒夠晒方便，只需事先充飽電，即可遠距離享受音樂及欣賞電視節目，就算係深夜，將電視或音樂開到大大聲，都唔怕嘈親人。
依家市面上好多耳筒動輒幾千元，大把年輕人爭住買，Robert貴為地產商，身家數以百億元計，但係佢都只係買幾百蚊耳筒，唔會一味追求潮流時款。呢種消費態度，係咪好值得時下年輕人學吓呢？
卓妮