政情：白鴿黨呃錢 鐵頭仁賣假畫

白鴿黨本月四日喺尖沙咀一間酒樓舉行十九周年黨慶晚會，期間仲拍賣籌募經費。鐵頭仁當晚捐出一幅聲稱係黃永玉所畫嘅《花鳥》拍賣，呢幅畫底價十五萬元，最後由肥亨以三十萬元投得，當晚席間更有人大嘆以三十萬元投得黃永玉畫作認真超值，但點都估唔到肥亨會中招。

不過，黃黑蠻前晚就喺微博發貼，話白鴿黨嗰晚拍賣嘅「黃永玉」畫作其實係「拙劣偽作」。我哋於是致電黃黑蠻，佢就話白鴿黨拍賣嘅畫只係將佢爸爸嘅畫東抄西抄，並唔係佢爸爸畫嘅，仲話三年前有朋友攞過呢幅畫畀佢睇，佢已經指出係假畫。佢仲話，已經同爸爸講咗件事，但可能外間賣假畫嘅情況太多，所以爸爸都係「哦」咗一聲就算。黃黑蠻就對白鴿黨拍賣偽作感到遺憾，覺得佢哋喺拍賣前應先行鑑定咁話。

白鴿急認衰 承諾退款

事件通天後，白鴿黨急急發表聲明，話該黨已經同黃永玉家人聯絡，告知當晚佢哋拍賣嘅畫係偽冒，仲向黃永玉同肥亨道歉，又強調該黨對畫作係偽冒一事絕不知情，佢哋會取消呢項拍賣，並向肥亨回水。不過，幅畫究竟係邊個人畀鐵頭仁，同埋幾時畀，至截稿前鐵頭仁都冇回覆。

咁啱尋日擺酒嫁女嘅肥亨就喺酒店回應投得假畫一事，佢話白鴿黨主席劉慧卿已親自致電同佢道歉，仲承諾退返三十萬元畀佢。佢又話自己唔識鑑賞畫作，特別係中國畫，早前得知有黃永玉畫作拍賣，覺得好興奮，於是決定競投，依家知道幅畫屬偽冒都有少少失望，但佢相信白鴿黨都係無心之失，唔係故意喎。