立法會議員范國威（Gary）同民間人權陣線召集人孔令瑜向來係民主路上嘅同道人，但Gary上月一個反盲搶地嘅聯署廣告就惹起孔令瑜把火，佢批評廣告聲明入面「破壞了香港文化秩序」，而「源頭減人」等字眼亦有冒犯內地新移民之嫌，早兩日更公開下戰書要求同Gary當面對質，估唔到兩個「同路人」為新移民反枱鬼打鬼。
孔令瑜尋日以關注中港家庭權利聯席發言人上電台節目批評，「源頭減人」字眼令人不安，認為Gary唔應該將社會問題嘅責任加諸新移民身上，觀感上有「隱性歧視」之嫌咁話，又話「你不殺伯仁，伯仁卻因你而死」，要求Gary澄清事實。
不過，Gary指香港唔可能無限量接收新移民，又話從來都尊重新移民以家庭團聚理由申請單程證來港。Gary以「言論廿三條」、「文字獄」反控孔令瑜言論，兩人聯同聯席發言人曾冠榮喺節目鬧交鬥疊聲，主持人都冇佢哋符，睇怕呢場爭拗唔容易平息。