中環出更：大劉戴罩開飯 保安霸升降機阻人
捲入澳門世紀巨貪案嘅華人置業主席劉鑾雄（大劉），尋日如常健步如飛到灣仔富豪飯堂食晏。之前大熱天時已見佢着住件褸，尋日天氣有啲涼意，佢就改穿厚身外套兼戴住囗罩，問佢係咪身體不適？對官司有冇回應？佢都一概唔答，木無表情匆匆行入飯堂。我哋報道過其保安嘅「霸道」攔路陣勢惹來途人不滿後，雖然之後有所改善，但點知尋日輪到「霸升降機」，唔畀其他顧客乘搭同一部升降機。
尋日中午十二時許，大劉抵達灣仔富豪飯堂，現場依舊有三名保安做好迎接準備，由於當時下着毛毛細雨，保安即打傘為佢擋雨，直到進入飯堂升降機口為止。由於部升降機未到，大劉背住記者等候，期間有其他顧客想入內搭升降機，保安即向顧客示意稍等一會，待大劉獨自入升降機後，其他顧客就被迫搭另一部升降機上去飯堂。之後大劉母親、妹妹同女友甘比、囡囡秀樺相繼到達飯堂。
憂心官司致病？
大約下午兩點半，大劉家人先行離開，而佢就殿後，但依然戴住口罩，問佢係咪憂心官司所以病咗？問咗兩次佢都不作回應，匆匆上車離去。
卓妮