中環出更：港鐵盛事 名人鬥Hea步
尋日港鐵嘅年度盛事「港鐵競步賽」早上喺中環遮打道舉行，其中全程一公里嘅主席邀請賽中，香港大學校務委員會主席梁智鴻（金刀梁）、立法會議員謝偉俊（Paul）及馮檢基、運輸及房屋局副局長邱誠武、前港姐鄭文雅等三十多人參加。大部分人都Hea住行，似「散步」多過「競步」，只有邱誠武一副「戰鬥格」，可惜都係後勁不繼得第五名，但竟然都有獎攞喎！
今年賽事由舊立法會大樓外嘅遮打道起步，經雪廠街再沿電車路圍繞遮打花園回到起點。大會向每名參賽者派發一件粉紅色運動衫，佢哋大部分都着晒短褲、波鞋，唯獨金刀梁着住條灰啡色嘅長褲搭疑似皮鞋，擺明志在參與，果然沿途慢慢行連競步姿勢都無擺吓。一向打扮出位嘅阿Paul就着咗條紅色運動短褲配對同色嘅波鞋，同大會件衫襯到絕，可惜競步時有啲吃力。
邱誠武「戰鬥格」有獎分
相反邱誠武就搏命得多，一起步已經守住第三位，可惜到咗後段開始有啲吃力，衝線時仲喘晒氣，好彩都守住第五名。參加嘅仲有港鐵主席錢果豐同行政總裁韋達成，雖然佢哋睇落好落力，但實力似乎就麻麻哋，成績只係中游位置。
賽事最終由香港會計師公會主席Keith Pogson奪冠，香港西醫公會會長楊超發就攞第二，德勤會計師事務所合夥人蔡永忠就攞第三。除咗冠、亞、季軍，第四、五名都有獎分，第四名係港鐵人力資源總監張少華，佢仲蟬聯埋最佳競步姿獎添！
卓妮