家陣嘅交通費貴到離譜，尤其係港鐵年年賺錢年年加價，如果有一個「為富不仁企業排行榜」，港鐵應該穩佔十大位置。眾多交通工具之中，巴士算係相對便宜嘅選擇，之不過問題係，搭巴士有時都幾煩，煩就煩在唔知條路線點樣行，隨時兜來兜去行大運，一頭霧水嘅乘客會大失預算。
身軀龐大嘅巴士仲會帶來另外兩個問題，第一個係廢氣排放，第二個係造成塞車。於是乎，一直有人要求巴士公司重組路線。好嘞，唔知係從善如流定係精簡架構，九巴繼推出第一階段路線重組之後，第二階段北區路線重組亦將於周六開始，上水及粉嶺將增設轉乘站，部分路線合併，部分路線取消，部分路線改道。
對於重組路線，有人歡喜有人愁，有乘客打算搭270A路線前往佐敦吳松街，到達巴士站先至發覺改道，搞到唔知幾狼狽。有區議員批評九巴宣傳不足，未有提供完整單張簡介路線重組細節，如果九巴冇改善宣傳，唔排除聯同其他議員叫停第二階段路線重組，畀時間市民掌握資訊。
其他路線重組嘅具體細節，請恕功夫茶唔囉囌嘞，有興趣嘅讀者麻煩透過其他途徑查一查資料。功夫茶主要想講嘅係，巴士路線重組啫，冇理由將老人家嘅長者乘車優惠都一併重組！
件事係咁嘅，現行長者乘車優惠係兩元任搭，無論乜嘢日子，無論乜嘢時間，適用嘅交通工具包括港鐵、巴士以及渡輪。呢一個優惠計劃嘅目的係鼓勵公公婆婆融入社區，唔好屈喺屋企做一個不問世事嘅宅男或者宅女。家陣九巴重組路線嘞，大家估下有乜嘢事情發生吖嗱？答案係公公婆婆轉車居然要另外多付一元四角，即係變相加價七成呀，離鬼晒大譜！
據講長者乘車優惠變相加價七成嘅原因係政府嘅錯，官老爺冇提供轉乘津貼咁話喎。如果此言屬實，特區政府實在太無良嘞，忘記咗長者乘車優惠嘅原意係孝敬老人家，報答佢哋奉獻一生建設香港嘅偉大功勞。
至於九巴方面咯喎，功夫茶想問一問巴士公司高層，路線重組嘅時候有冇為公公婆婆據理力爭呀？有冇向唔識得敬老嘅港產官僚發出溫馨提示呀？政府冇提供轉乘津貼居然照單全收，九巴一樣有疏忽o架咋，係咪？
總而言之，巴士路線重組唔應該將長者乘車優惠都重組，麻煩政府同九巴貫徹敬老嘅初衷，繼續維持兩元任搭嘅車費，否則，隨時激起公公婆婆上街抗議都似！