政情：譚文豪日日煲劇唔使飛？
本身係飛機師、曾經參加過區議會同立法會選舉嘅譚文豪（Jeremy），最近因為電視劇《衝上雲霄2》曝光率大增，佢喺社交網站開設嘅解構劇集錯處專頁更有過萬名「粉絲」。不過，正因為佢嘅專頁更新速度非常緊貼每集劇情，所以有網民就質疑，民航機師成日要飛，應該好忙至係，但點解佢好似唔使做咁嘅？
每晚放工更新專頁先瞓
Jeremy話，其實佢為咗更新專頁每晚都會追劇，就算落機返到屋企已凌晨三、四點鐘，佢都堅持睇埋套劇、更新埋專頁先至瞓覺，咁啱好彩最近揸短線、即日來回嘅航班，否則真係唔瞓都搞唔掂喎。如果大家有睇到佢嘅專頁，真係學到好多航空業鮮為人知嘅冷知識，仲可以得悉佢提供嘅入行須知添。
雖然Jeremy喺過去選舉都落敗，但仍有意參加二○一五年區議會選舉，最近已經開始落九龍東做地區工作，仲勤力到連街市洗手間設施問題都唔放過。佢仲大嘆話，如果今年係選舉年就可以食正劇集效應，仲話如果後年區議會選舉再推出第三輯就好喎。