政情：尼童Limbu「活埋」聶德權
尼泊爾籍男童Limbu早前因為流連街頭而被童黨欺凌及活埋溝渠接近五十小時，引起社會對少數族裔青少年服務嘅關注。曾經做過社會福利署署長嘅現任政務司司長辦公室專員聶德權，尋日就去到油麻地一間少數族裔支援服務中心了解，順道探望在場嘅Limbu仔。不過，聶德權嘅吸引力似乎唔夠電腦遊戲大，事關佢不停撩Limbu仔傾偈都被當透明，對方淨係掛住打機，以冷淡態度將聶德權「活埋」。
遇欺凌險喪命 康復進度理想
無奈嘅聶德權之後就參觀中心嘅其他運作，又同入面嘅少數族裔長者一齊耍毛巾操，佢事後話會繼續落區跟進，希望幫助落實政府、志願機構及企業三方推動少數族裔升學及就業嘅目標。另外，支援中心尋日亦將早前向全港市民徵集所得嘅心意卡輯錄成冊送畀Limbu仔，佢養母仲喺入面留言話：「再次見你真的比中六合彩還要開心。」而照顧Limbu仔嘅社工就話佢康復進度理想，暑假期間最愛到中心玩機械人同打機，活潑好動。