政情：恨鐵不成鋼 梁粉促CY「變中求穩」

倡移動前朝三座大山

ＣＹ上任特首前後經常將「穩中求變」同「迎難而上」掛在口邊，有「梁粉」形容，ＣＹ過去一年只做「穩中求變」的「穩」，主打土地房屋規劃工作，可惜最快都要四至五年先有成效，反而未見有任何「變革」，佢相信「變中求穩」將會係香港未來政治嘅出路，因此極需立竿見影政策舉措為新政府挽救民望，建議不如對準前朝政府三座大山「動手術」，為新政府闖出一條新施政血路。

其中最快見效嘅就係回購西隧，收回東隧專營權。該名「梁粉」話，政府一直擔心回購或收回隧道專營權要動用公帑，查實即時回購後可以發債集資，預料未必要動用太多公帑，隨即可調節三條隧道收費，產生隧道分流效果，回應同解決市民過海塞車嘅困擾。

改革強積金係另一座急待移動嘅大山，事關強積金一直被批評行政費高，蠶食市民供款，影響退休保障，有「梁粉」一早建議把強積金變為「公積金」，包括為未有強積金嘅成年市民設立「公積金」，由政府發行專門給公積金投資嘅通脹掛鈎債券，包括港鐵、隧道、其他政府資產等，做到公營事業收益全民共享。

第三座大山就係回購領匯股份，並在領匯一百八十多個商場，劃出一定資金比率用作扶助社企，為小商戶重拓生存空間。不過，該名「梁粉」承認，回購領匯極具爭議，加上要承認前朝政府搵市民笨，所以料將阻力重重，ＣＹ對於呢個問題宜謀定而後動較為划算。「梁粉」救民望、得民心嘅大計，全部都係動搖根本利益者嘅利益，ＣＹ係咪聽得入耳，明年初第二份施政報告自有分曉。