中環出更：貪曾子寂寞難耐 高攀長腿索女
「貪曾」前特首曾蔭權爵士幼子曾慶淳（Thomas），早前被《好報》獨家揭發佢夜蒲蘭桂坊、當街攬女癡纏，猴擒程度令人咋舌。卓妮日前喺香港菁英會就職禮上，又見到並非該會成員嘅Thomas無啦啦出現，點知好多人都當佢透明，唔知仲以為佢去錯地方兼搭枱。甚為無癮嘅佢，最終按捺不住寂寞，於眾目睽睽下主動「出擊」，向一位長腿索女埋手，猛撩對方傾偈。
當晚喺會展舉行嘅就職禮上，城中名人雲集，接近宴會開席時間，卓妮見西裝骨骨嘅Thomas一支公現身。
出席宴會被當透明
Thomas揸住杯紅酒，好積極咁於會場中穿插，似乎想同一眾青年才俊打交道，但始終冇乜人理佢。查實Thomas以乎同菁英會大纜都扯唔埋，唔知係邊個成員邀請佢出席嘅呢？Thomas慘食一輪悶棍，本來已臉黑黑，心情唔好就更加唔使講，但佢忽然精神一振，皆因眼前出現咗一位身材高挑、身穿白色喱士裙嘅長腿靚女。
據講呢位長腿靚女係富家女，Thomas趁住靚女身邊冇人之際，挺起胸膛一副「戰鬥格」咁，主動上前同對方打招呼，然後開始一輪嘴講個不停。期間Thomas舉起左手指手劃腳，又提起右手到胸前扮紳士。面對個子不高嘅Thomas，長腿靚女只好側側身彎低腰遷就去聆聽，仲聽到木無表情，最慘係Thomas愈講愈興奮，毫無停止嘅意欲，但靚女都有禮貌繼續聆聽，真係戥個靚女辛苦。
卓妮