沒有最醜，只有更醜。大家仲記唔記得尖東消防處總部大樓呀？呢，上星期火燭嗰座呢，消防重鎮居然城門失火，滑稽程度好比差館畀賊佬打劫，本來已經夠晒羞家。哈，原來咁都未算，呢座惹火大樓又爆醜聞，今次仲衰，知法犯法，偷雞違反消防條例，你話消防處係咪淪為醜聞集中營吖？
係咁嘅，本報明查暗訪，發現消防處總部大樓十二樓天台別有洞天，乃係消防泵房嘅「私家重地」。嗱，咪誤會呀，私家重地唔係指泵房保安森嚴，而係指成間私人屋企一樣，地板放有洗衣機，窗台放滿清潔劑，窗口掛毛巾，喉管開關掣掛衣架……簡單啲講，即係消防泵房變咗洗衫房，消防設備淪為消防官僚嘅洗衫設備。
消防官僚係咪懵咗呀？係人都知，消防泵房擔負整座大樓滅火水源供應，重要性儼如滅火系統嘅心臟，一旦水泵損壞，火警時就會無水救火，後果不堪設想，所以泵房一律嚴禁作其他用途，更不得放置雜物、易燃物品以及另加電線。消防處平日巡查樓宇消防安全，其中一個重點就係檢查消防泵房係咪符合標準，自己反而明知故犯，仲有乜資格管人呀？
唉，消防官僚咁緊張洗衫，洗心革面好過啦，事實再一次證明，消防處就係嗰間不合格嘅消防泵房，藏污納垢烏煙瘴氣亂七八糟。話時話，消防泵房變洗衫房，今次醜聞唔止暴露消防官僚無視消防設施安全，更加反映佢哋目無法紀，違規枉法已經到咗瘋狂地步。嗱，近年內地貪官流行喺辦公室闢設「洗頭房」偷享魚水之歡，消防處總部呢間「洗衫房」其實一字之差o架咋，都係無規無矩綱紀敗壞！
講開又講，消防官僚管理不善醜聞不絕，唔係救火甩漏就係救人甩拖，唔係消防設施死火就係調派系統跪低，唔係高層假公肥私就係下層違紀違規。咁搞法，消防處個招牌掟落洗衣機洗十日十夜都一樣污糟邋遢o架咋。最令人火滾嘅係，消防處自身難保，仲要不務正業，滋擾正義傳媒，打壓新聞自由，點可能唔火燒後欄吖？
一件污，兩件穢，三件無所謂，今次洗衫房醜聞顯然就係消防處長期管理混亂嘅結果。港府再唔撥亂反正，整頓消防官僚，消防處總部唔止有洗衫房，遲啲可能真係有「洗頭房」、「洗身房」、「洗錢房」。點解洗衫變洗錢？哦，消防處腐敗不堪，再咁落去，話唔定有朝一日會時光倒流回到「有水有水，冇水散水」嘅貪腐年代o架！
一句講晒，泵房竟變洗衫房，消防官僚已瘋狂。消防處亂象叢生，無可救藥，歸根究柢就係處長陳楚鑫等消防高官管理不善，劣迹斑斑，若然要為消防處洗白白，用洗衣機都唔掂，港府一定來個大清洗至得o架！