政情：郝柏村爆子人緣唔好
台灣前行政院院長郝柏村經歷過八年抗日戰爭，亦見證中國同台灣數十年嘅兩岸關係發展，佢最近唔止出書解讀抗戰歷史，尋日仲首次來香港演講。不過，成個講座內容主要都係圍繞佢嘅新書，搞到好似新書發布會咁，難怪曾經係軍人嘅郝柏村，都自嘲係「拿槍桿子的人」，來演講、做學者係不自量力咁話。期間佢講到自己出任台北市長嘅兒子郝龍斌時，仲爆料話兒子人緣唔好添！
自稱「雙一老兵」
郝柏村尋日到香港城市大學就武力統一同和平統一呢個題目演講，佢形容自己係「雙一老兵」，即一無所長同一事無成，今次只係為其《郝柏村解讀蔣公八年抗戰日記》嘅新書報告心得。談到兩岸關係時，佢話中國人以前就槍桿子下出政權，但兩岸關係已由交戰變交流，以武力達致統一嘅時代已過去，只能和平發展。對於民主，佢就話過程係緩慢嘅，美國人以為選舉可解決問題，實際上亦並非如此，而台灣至今仍有買選票情況，但民主必須要做到鈔票不等於選票至得。
講到兒子做台北市長，郝柏村就話台灣政治中，政見同人緣好重要，不過兒子就有佢啲不良遺傳，就係人緣唔好，但佢對兒子嘅政見就好贊同咁話。