政情：蔣麗芸似玩泥漿摔角
商界出身嘅蔣麗芸（Ann），去年以高票當選進身立法會議員，話咁快就做咗一年議員。阿Ann尋日喺社交網站為首年議會表現做個總結，佢自言起初好似失明人咁到處摸索，後來先至喺泥濘谷底爬起身。不過，講到尾如果唔係有人幫佢改咗個「政壇元秋」花名，相信佢都無咁快喺芸芸新丁議員中跑出。
過去一年出位爆金句
阿Ann自言，剛做議員時好似失明一樣到處摸索，害到元秋女士被人罵咗好一陣子，直到今日佢總算從泥濘谷底爬起來，雖然身上泥巴還未完全乾透，但相信終會慢慢脫落。
聽佢咁講，好似講到自己玩泥漿摔角咁款。佢又話，從商界跳到人群中，令佢有全新體驗，由開始時嘅彆彆扭扭，到依家灑灑脫脫開始融入。
事實上，阿Ann過去一年議會表現可以用出位來形容，首先力撐因國教事件備受批評嘅教育局局長吳克儉，高聲反問「使唔使炒咗佢？」之後佢又真情流露力撐特首梁振英處理僭建事件嘅方法，仲爆出「男人結婚周年紀念日都記唔清，何況個花棚？」嘅金句。
所以話呢，議員爆金句有助加深市民嘅印象。