政情：葵青區會充大頭鬼

睇牙驗眼打針 乜都想包

葵青區議會決定用政府資助嘅一億元推行社區健康服務，班議員對點樣推行已經意見多多，又話搞健康講座，又話要畀長者免費健康檢查。一班泛民主派議員本來就諗住幫吓長者，等佢哋可以睇牙驗眼，但建制派當然唔會放過「成功爭取」嘅機會啦，於是就話要加埋幫長者打流感針。不過，問題就出現喇，當樣樣嘢都話要做時，葵青有成十幾萬長者，一億元又點會夠分呀！

受惠限制多 苦了老人家

世事最難嘅莫過於喺有限嘅資源去滿足無限嘅需求，淨係諗邊啲長者可以受惠都已經搞到班議員頭都大埋。注射流感疫苗一支針只不過係一百幾十元，但睇牙驗眼嘅花費就唔簡單喇。好似睇牙咁，有議員就覺得為長者提供基本檢查就夠，但有人就認為唔包剝牙、鑲牙根本幫唔到長者，但包埋嘅話條數就好襟計。最後大家都係決定做嘢做全套，但預計受惠人數就由每年四千人減到三千五百人。

受惠名額有限，自然會爭崩頭。如果以年齡去分，七、八十歲以上嘅都未必有心有力去搞棚牙，五、六十歲以上嘅人數又太多，最後議員就諗住以口腔健康情況去決定能否受惠，但事實上啲牙爛成點、甩咗幾多隻先有得受惠又係一個難題。當搞掂個服務套餐，但仲未計算萬一有長者為咗呢啲免費服務不惜搬屋過區，到時真係唔知點算好。

班議員平時就成日鬧政府啲資助項目限制多多、名額又少，到佢哋自己落手落腳做咪又係搞到一鑊泡！如果到時搞到啲長者一路對住份申請表、一路數自己甩咗幾多隻牙、夠唔夠資格咁就該煨囉！