中環出更：出身徙置區 努力「鐘」成功
中學文憑試啱啱放榜，保良局尋日就頒發獎學金畀考獲三科5**以上嘅屬下中學學生，共有十九位男女學生獲得表揚。保良局主席鄭錦鐘（Eric）、副主席梁安琪及前主席顏顏寶玲等人，特登抽空去為同學仔打氣。Eric自爆出身徙置區，後來憑努力取得今日成就，勉勵同學不必在意出身寒微，又話如果將來有在座同學做到保良局主席就好喇！
個人經歷勸勉學生
不過，Eric話口未完，就猛呻保良局主席唔易做，事關佢平均每個月要簽三千個名，試過最誇張嘅一次，係一日簽一千個名，真係簽到手軟。點解要簽咁多名？咪因為保良局瓣數多，文件及支票多多，幸好佢勤做手腕操，如果唔係簽到勞損都唔出奇，所以佢話乜嘢崗位都充滿挑戰。Eric感觸咁大，皆因考獲五科5**嘅李俊穎同學話，自己出身屋邨，曾經迷惘如何同其他社會地位較高嘅同學相比，所以Eric咪以自己嘅經歷勉勵同學仔囉！
賭王四太梁安琪亦喺百忙之中抽空到場，但佢忙到不得了，亮相一陣就趕住走，話要返去澳門喎！至於顏顏寶玲就代表「保良局顏禧強伉儷獎學金」，向成績最好嘅八位同學每人頒發一萬元獎金，事關獎學金係以佢同埋丈夫顏禧強名義捐助。
講到未來發展大計，Eric計劃喺旺角保良局綜合健康中心推行「贈醫施藥」，又為資優生提供耍太極及跳繩訓練，等佢哋抒發旺盛精力，讀書更加集中注意力。
卓妮