雖然三號風球，照樣上街示威，證明七一遊行係香港人唔可以缺席嘅重要活動，毋懼風雨嘅熱血情懷令人豎起大拇指講一聲，好！
年年七一都有咁多人怒氣沖沖走上街頭抗爭，表達呢樣嗰樣嘅不同訴求，反映一個非常可悲嘅情況，就係回歸十六年以來本地統治集團一無是處，特首換完一個又一個，唔掂檔始終係唔掂檔。當中仲有一個趨勢，上街示威嘅年輕人愈來愈多，表達手法更加係愈來愈激，應該點樣解讀呢？年輕人身為社會未來主人翁，如果佢哋覺得前途黯淡，梗係要挺身而出爭取一個改善前途嘅機會啦，唔通坐以待斃咩！
啱啱遇着剛剛，尋日喎，有團體調查顯示大部分年輕人自我感覺不快樂。問卷調查嘅對象係十八至二十五歲後生仔，超過六成受訪者認為生活喺香港覺得不快樂，只有兩成左右覺得快樂。不快樂嘅年輕人有乜嘢不滿嘅呢？兩成不滿政府管治差，一成半不滿通脹嚴重，一成不滿環境擠迫、學業壓力以及難以置業。
調查又發現，四成七受訪者對前景抱持消極態度，即係對未來不寄予厚望。功夫茶覺得有一點非常有趣，簡直係啼笑皆非嗰隻，只有百分之四嘅後生仔希望自己成為特首。換言之，特區行政長官原來係一個不受歡迎嘅職位，可能因為經過十六年實驗證明，特首呢份工吃力不討好之餘又形象低落啩，低落到阿貓阿狗都有資格指住佢鼻哥窿破口大罵。
好嘞，調查顯示年輕人不快樂，咁就解釋得到點解七一上街愈來愈多八十後以及九十後。喂，家陣少年十五二十時嘅小朋友確係憂心忡忡o架，讀書畢業唔知會唔會失業，即使有工開都唔知有冇屋住，萬一小朋友嘅父母係搵朝唔得晚嘅草根階層，一家幾口隨時要屈居一百呎唔夠嘅劏房，咁嘅居住環境肯定會激發年輕人上街示威，要求政府增撥資源興建公共房屋，唔好任由地產霸權為所欲為。
講真吖，香港人質素確係好高o架，雖然遊行人數咁多，當中又有精力無窮嘅年輕人，之但係一腔怒氣都冇變成危險動作。大家睇下埃及吖，示威者搞到全國大亂，又放火，又殺人，所到之處滿目瘡痍。功夫茶想講嘅係，人類忍耐力有限o架咋，尤其係慘綠少年更加躁動不安，若然特區政府硬係唔聽民意自把自為，和平示威然後和平散去唔係必然o架，懵丙！
所以計功夫茶話齋，如果唔想動感之都淪為動亂之城，一定要想方設法令到年輕人覺得前途無可限量，漠視民憤只會引火自焚。