政情：今日你上鏡：要求高

近年政府大力提倡環保「無紙化」，輕巧又慳紙嘅平板電腦成為唔少議員嘅好幫手。日前一個晚上，我哋見到立法會體育、演藝、文化及出版界議員馬逢國，走入金鐘廊一間電訊公司，佢對店員推介嘅一部平板電腦好感興趣，拿上手睇咗一輪，個心十五十六咁，但最後都係冇買就離開。原來佢一直用緊個仔部平板電腦，所以想買部新嘅畀自己，點知佢要求好高，既要夠輕夠薄，諗住帶出街瀟灑啲，仲要電池耐用，最重要係顯示屏幕夠大喎，唔怪得佢揀唔啱喇，睇嚟佢要再等新產品推出喇！