政情：八網難逃：新書講座「生」不逢時

旅遊作家項明生（James）近日有旅遊新書發布，有關方面仲安排佢尋日下午四時出席新書講座。不過，大家都知尋日係乜嘢日子，所以James前日就喺社交網站大嘆喺七一搞講座係「生不逢時」，當初一時無諗到呢個日子有幾重要，事關好多人上街，又有人維穩，仲有人去啟德參加巨蛋音樂會，所以好擔心太少人去聽講座。佢仲話，如果太少人出席嘅話，就當係大家傾偈咁話。James後來就諗到自己本大作中有一章係講「民主祖母誕生：雅典」，都叫做同尋日遊行主題拉上關係啦，加上尋日個講座都唔係太冷清，證明佢啲粉絲幾咁忠實。