雖然距離下屆立法會選舉仲有三年，但其實各黨派已開始部署各區人選。其中工聯會（工記）已多次傳出遲遲未諗掂派邊位出戰地區直選，就連現任嗰六位議員下屆被分派去邊區參選都未諗掂。
不過，有熟悉工記嘅人士透露，近日喺工會入面有意見認為，首先決定派邊位出戰新界東，就要睇吓各人嘅見報率。但係見報率同佢哋出戰新界東又有咩關係呢？
根據工記部分成員嘅觀察及分析，原來佢哋覺得今屆新界東嘅議席就係輸在工記葉偉明嘅知名度唔夠其他候選人高，而大部分贏得呢區議席嘅議員，唔係本身知名度高，就係喺選舉期間夠出位，而且當選過後，佢哋嘅見報率都較其他議員高。
所以工會有聲音認為，嚟緊派選新界東嘅成員就算騎呢啲都冇所謂，最重要係知名度高咁話。
其實喺工記入面不論知名度，又或見報率高嘅議員，唔係當選超級議員嘅「阿姐」陳婉嫻，就係參選過兩個選區都順利勝出嘅王國興（阿王），所以如果真係要講出位同見報率嘅話，咪等於焗嫻姐及阿王是但一個出選新界東？