政情：象哥自爆係攝影發燒友
政界人物不時做「空中飛人」，有時見到良辰美景固然可以用相機影低做留念，但講到真正攝影發燒友就十隻手指數得晒，其中自認好鍾意影相嘅有立法會進出口界議員黃定光（象哥）。象哥早前出席攝影比賽頒獎禮時，自爆本來好鍾意影相，但自從做咗議員後就冇乜時間影相，已經放低相機好多年喇。
樹根都好「機」
問到有冇收藏相機嘅習慣，象哥話有一部古老嘅Pentax相機套裝，係結婚時爸爸送畀佢嘅，依家仲放喺防潮箱入面保存。當年象哥父親送相機畀象哥做結婚禮物，難道象哥係鍾意影相之人？象哥話，其實係佢爸爸鍾意影相就真。
講開立會攝影發燒友，不得不提身兼東區區議員嘅「雙料議員」鍾樹根，事關佢對相機都好有研究，而且收收埋埋好多珍藏，最為人熟悉嘅係貴價德國Leica相機，講得貴價當然係免得過都唔好外借啦。不過話說回來，其實政界人士收藏幾多靚相機都無用，因為無幾多個真係夠膽將自己嘅攝影作品公諸同好，所以啲攝影器材講到幾勁都無用，睇相先至見真章。