政情：周伯展獲委任太平紳士

顏寶鈴連推薦人都唔知

周醫生接受查詢時形容，今次獲委任為太平紳士好開心，呢個係好好嘅認同，又話今次太平紳士名單內有多名醫學界代表，其中香港腎臟基金會主席雷兆輝係佢中學同班同學，所以覺得彼此好有緣分喎。同樣獲委太平紳士嘅有保良局前主席顏寶鈴，顏太自言感到有少少意外，因為事前無諗過，就連究竟邊個推薦佢都唔知，佢話會視此為鼓勵，繼續為社會做事。

除咗周醫生同顏寶鈴外，去年七一政府換屆後，先後離開政府嘅前公務員事務局局長俞宗怡、前食物及衞生局常任秘書長李淑儀同前運輸及房屋局常任秘書長何宣威三人，都獲委任為非官守太平紳士，另外著名小提琴演奏家姚珏等亦榜上有名。