中環出更：揀靚黑珍珠 蔡關穎琴教路
唔少女士都喜愛佩戴珍珠首飾，打扮得高貴更感「珠光寶氣」，好似女童軍副會長蔡關穎琴（Janice）都係珍珠愛好者，不時戴上珍珠頸鏈出席各項活動。Janice話最愛白珍珠，貪佢容易襯衫，日間可以戴住返工，夜晚換上晚裝又襯到。佢亦愛充滿神秘感嘅黑珍珠，仲教卓妮點揀靚嘅黑珍珠添。
珠身泛孔雀般幻彩屬上品
Janice話，近年黑珍珠首飾愈來愈流行，感覺比白珍珠更型格。佢話，最靚嘅黑珍珠並非愈黑愈好，珠身要泛出恍如孔雀般嘅幻彩，先至係上品。講到品質最好嘅黑珍珠，Janice話係來自大溪地，但大家唔使飛去當地買，事關香港已經集中咗全球最靚嘅珍珠喇。
趁住暑假，Janice下月中會同老公蔡冠深及四個仔女，先坐郵輪遊歐洲兩星期，之後佢老公同三個囝囝先返香港，佢就會再同囡囡到米蘭shopping買餐飽，佢話唔想兩母女去購物時悶親啲男士喎！至於大仔Johnson，就因為忙於工作而未能同行喇。