同人唔同命，同遮唔同柄，今時今日做一個無權無勢嘅弱雞小市民真係好鬼死冇陰功o架，隨時因為一個幾毫而惹禍上身。高高在上嘅達官貴人就唔同嘞，無論幾咁貪婪又幾咁大咬，始終有本事得到法外開恩嘅特殊優待。
因為一個幾毫而惹禍上身絕對唔係誇張失實嘅隨口亂噏，大家應該記得前一排有個的士司機，只不過找贖少咗五毫子之嘛，竟然被乘客報警緝兇，而警方居然又煞有介事立案調查，將呢一個已經完全忘記有呢一回事嘅的士司機捉上法庭受審。好彩，法官大人明察秋毫，質疑警務人員小題大做，最終控方撤回呢一單無厘頭到極嘅「五毫子官司」。
之但係好可惜，有人仍然為咗區區一元咁大把而被執法者告到甩褲。話說東區海底隧道有一位收費員，任職十九年o架嘞，有一日工作期間執起一元硬幣放入褲袋，上司從閉路電視見到咁嘅情況，唔理三七二十一報警處理。呢一位人到中年劫數難逃嘅收費員，就咁被官老爺捉上法庭受審，法官以一項盜竊罪判佢自簽二千元守行為兩年，繳付一千元堂費。被告由於一蚊雞惹禍已經夠悲哀，更加大鑊嘅係連份工都冇埋，慘遭公司解僱之後痛失一大筆退休金。
冇錯，貪五毫都係貪，貪一蚊都係貪，之不過功夫茶想問一問，若然蟻民貪少少都要秉公處理，前特首曾蔭權嗰種貪盡海陸空又點計呀？前廉政專員湯顯明利用數以萬計嘅公帑豪飲宴客，呢一筆爛帳又點算呀？立法會議員陳偉業講得啱呀，執法部門以及法官大人喺「一蚊雞官司」之中矯枉過正，若然小職員貪一蚊都要嚴懲，貪曾應該判無期徒刑啦！
講起達官貴人擁有特權，簡直係七竅生煙眼火爆。好似嗰個法官姪女Amina咁吖，醉酒駕駛撞車不特止，居然倀倀雞雞出手摑到個警察暈陀陀，結果襲警咁大罪都唔使收監，後來只不過因為違反保釋條件而入冊咋。如果換成無權無勢嘅弱雞小市民，你試下摑警察叔叔一巴掌吖，話唔定好似嗰一個尼泊爾籍流浪漢咁樣死於警槍之下。
唔好怪功夫茶長氣，廉署調查咗咁耐嘞，到底貪曾幾時先至法辦呀？人哋隧道收費員貪一蚊小便宜之嘛，查案查到風雷火電，極速落案，極速上庭，曾爵士左貪右貪上貪下貪，涉及嘅金額閒閒地係一蚊雞嘅幾十萬倍甚至更多，點解仲任得佢好似「金翅自由鳥」咁樣風流快活呀？蟻民小貪就罪不可饒，權貴大咬就法外逍遙，咁嘅所謂法律面前人人平等，直情係令人唔識笑嘅爛笑話。