上屆區議會選舉，立法會議員田北辰（田二少）一鋪得米，成功攻下荃灣愉景新城選區，雖然未知佢下屆係咪想連任，但已經湧現新對手。曾幫田二少打工嘅私人助理趙恩來，近月已經披上工黨戰衣，下屆仲可能落區同田二少對撼。如果真係成事，呢場倒戈之戰好有睇頭，可以話係小員工火併大老闆嘅政治版。
愉城選區本身係白鴿黨喺荃灣區嘅中產票倉，上次該黨王銳德輸咗畀田二少後，都似乎半放棄該區，但該黨仍想派其他人參選，費事流失大批中產票源。不過，地區人士就發現，田二少前助理、現時已轉投工黨嘅趙恩來，最近密密落荃灣區，仲經常出現喺愉城派單張，又擺檔接受街坊投訴，擺明向前老闆挑機。田二少回應話，呢個世界自由競爭嘅，任何人有權利參選，佢亦唔怕有競爭，仲話愈多泛民主派出選愈好，等選民可以有多個選擇喎。
距離區選仲有好長時間，但增設堆填區就臨近埋身肉搏階段，田二少話已經諗好堆填區點投票，只要政府承諾將所有垃圾車轉為密封式，垃圾運去轉運站後，再由海路運去堆填區，最後係採取防臭措施，如果三樣承諾都無問題，佢先會支持將軍澳堆填區，如果通過的話，佢就支持其他兩個堆填區，如果否決，其餘兩個就投反對票。