政情：推廣閱讀 名人撐「漂書」
「漂書」呢股源自歐洲嘅閱讀風氣，近年漸漸吹到香港。幾位城中名人為響應今年漂書節，尋日各自帶同自己嘅著作或心愛嘅書籍，於柴灣青年廣場「放漂」，期望「漂書」喺人海之中遇上有緣人。去年從德國獨自踩單車返港嘅單車達人李明熙，就捐出書籍《朋友日記》，佢話呢本書係講述十多年前兩位「電波少年」由南非流浪到挪威嘅故事，睇咗呢本書之後，發覺去旅行唔一定要跟旅行團，從而啟發到佢獨闖歐洲遊歷。
項明生指活動帶出環保
另一位參與「漂書」活動嘅旅遊作家項明生（James），佢除將個人新作「放漂」，仲鼓勵公司員工積極參與。James話，好多人都只係利用搭車或等電梯嘅「時間碎片」，於網絡吸收零碎資訊，獲取嘅知識較為片面，而漂書活動既提倡閱讀風氣，亦具環保意識，所以佢好支持。
至於民政事務局首席助理秘書長馮浩賢，就話會同家人一齊「放漂」，而佢最愛閱讀嘅書籍，就係以政治為題材嘅「Yes,Minister」。灣仔區議員伍婉婷就話，「漂書」活動不但可接觸心儀書籍，更有機會讀到以前讀者記下嘅讀後感，呢種體驗真係千金難買。