政情：逢貪必保建制派放生曾湯

爭做專委會主席 葉國謙厚顏

過去連串貪腐醜聞，先有前政務司司長許仕仁，然後再有貪曾貪盡海陸空、歎盡省港澳，緊隨就係貪湯豪花買酒兼宴客送禮，三個「貪」字輩嘅前高官，因一己之利賠上本港核心價值。雖然本港常以法治自居，但連串高官貪腐事件即使有執法機構調查，亦猶如墮入黑洞，無疑令人質疑官官相衞，難治貪官。

最可惜嘅係，立法會一班建制派議員面對貪官醜聞，仍然表現得愛理不理，並無運用法例賦予議員嘅權力去提出調查，反而放棄監察同追究。就好似貪曾事件揭發之初，泛民主派先後提出不信任及彈劾動議，並引用作為「尚方寶劍」嘅《立法會（權力及特權）條例》徹查，但建制派議員就誓死護航保貪曾。最遺憾嘅係，類似戲碼喺最新嘅貪湯事件上再一次上演，建制派仍然對特權法表現得異常忌諱，同時進一步揭露佢哋赤裸投誠唔要面。

早前泛民議員提出運用議事規則提出呈請書成立專責委員調查貪湯，班建制派議員明明話立法會已有政府帳目委員會（帳委會）調查，質疑再設專責委員會調查係疊床架屋，所以不表支持。

不過，當泛民議員搭好個台後，班建制派議員就忽然打倒昨日嘅自己，拉隊加入，最後十三個委員佔咗八個建制派，本身係保安事務委員主席嘅民建聯葉國謙仲要爭埋委員會主席嚟做，誓要將保護貪湯嘅安全系數推到最高，力控調查貪湯嘅主導權。

石禮謙指不再傳召貪湯

建制派主導調查嘅弊處終於喺尋日嘅帳委會會議上出現，今次主事者就係謙恭投誠嘅地產建造界議員石禮謙（大舊石）。帳委會召開第五次聆訊，傳召現任廉政專員白韞六作供，點知會後大舊石就宣布完成作供階段，並會盡快撰寫報告，肯定唔會再傳召貪湯作供。如果根據貪湯之前十問九唔答嘅供詞，帳委會最後可以寫到咩報告呢？為保障公眾知情權，佢哋最好將委員會正名「保貪委員會」，避免令公眾誤解佢哋喺查貪方面出過力。