中環出更：搞事四人幫策劃7.1？
壹傳媒肥佬黎位於何文田嘅大宅日前遭人飛車撞冧閘，但無損佢密謀搞局嘅雅興，事關卓妮尋晚又見民主黨創黨主席「李漢奸」李柱銘、「民主阿婆」陳方安生、天主教香港教區前主教陳日君前後腳去肥佬黎個「搞事指揮部」屋企聚會。今次「搞事四人幫」齊晒腳，究竟所為何事呢？莫非談論美國中央情報局前特工斯諾登爆大鑊事件？抑或佢哋等得唔耐煩，要親自為「七一遊行」搞局指點江山？
「搞事四人幫」一係唔聚頭，走在一起總係無乜好事發生，卓妮尋日仲直擊搞事四人幫七一前聚會實況。話說尋日朝早肥佬黎外出時神情呆滯，直到下午四時才返回寓所。
但到下午五點三十五分，肥佬黎同家人又乘車離開寓所，事隔十五分鐘後到咗大圍寶福紀念館，之後見肥佬黎等人到某個安息堂停留前後約廿分鐘，及至晚上六時三十五分就自己一個離開，大約晚上六時五十分就回到寓所。
咪以為肥佬黎返到寓所就天下太平，實際上係「搞事四人幫」密會嘅開始，事關肥佬黎又利用自己寓所呢個「搞事指揮部」，靜雞雞約埋搞事四人幫其他成員會面。晚上七時零五分，肥佬黎嘅其中一部座駕返回寓所，但載住嘅竟然係陳日君。事隔五分鐘後，李漢奸親自揸車載住四人到肥佬黎寓所，其中一人係上次無出席聚會嘅民主阿婆，之後有疑似肥佬黎嘅工人到李漢奸車尾，拎咗盒類似蛋糕嘅物體入屋，佢哋一直傾到晚上十時才離開。
敏感日子前齊腳出現
七一臨近，但搞事四人幫喺呢個敏感日子前夕聚會長達約三小時，話佢哋無傾熱門話題，包括討論七一前夕有乜新招催谷遊行、「佔領中環」預演行動等問題都無人信啦！
黎稱已加強大宅保安
講番搞事四人幫聚會前情況，肥佬黎早於七時許就由司機接載離開大宅，當問及會否加強寓所保安時，佢一指背後大宅，故作輕鬆話加強咗保安，再被追問會否擔心係寫錯嘢得罪人時，佢則擰擰頭話：「唔知、點知啫，好嗎，OK，唔該！」當再追問「有無頭緒係咩人做」時，佢登時寸嘴話︰「點知啫，神探咩，真係吖！」之後再被追問時，佢僅連番重複四次「唔該」，並關上車窗，司機即加速開車離開，顯得有啲唔耐煩。
卓妮