升降機絕對係一個有益有建設性嘅偉大發明，尤其對於高樓大廈無處不在嘅石屎森林而言，有咗升降機就唔使一步一腳印行樓梯。你試下由地下行樓梯上六十樓返屋企吖，睇怕你未上到三十樓已經冇咗半條人命。如果冇咗話咁快就返到屋企嘅升降機，大廈頂層連天台特色戶冇可能係價值過千萬嘅豪宅囉，賤價而沽都無人問津，除非住客有本事好似蜘蛛俠咁樣爬高爬低來去自如。
之但係升降機同其他機器一樣，萬一故障失靈壞鬼咗，隨時變成非常恐怖嘅殺人兇器。最得人驚嘅情況係，升降機不受控制急速下墮，搭客唔跌死都嚇到三魂唔見七魄。好衰唔衰，香港近年一次又一次發生升降機急墮事件，好明顯係維修保養出咗好大紕漏。
呢嗱嗱嗱，長沙灣富昌邨可以話係升降機故障嘅重災區，前年五月有一鑊，舊年五月整多鑊，今年六月又一鑊。最新呢一宗畸屎係咁嘅，家住富昌邨富韻樓二十樓嘅一對兄弟，諗住落樓買啤酒同爸爸慶祝父親節啦，點不知搭正一部「鬼馬神經升降機」，傳出怪聲之後失驚無神高速下降，兩兄弟失去重心凌空拋起，然後再砰磅一嘢撻落地。死過翻生嘅兩兄弟抬頭一望，身處嘅位置已經係三樓。消防員接報到場撬開升降機門將兩人救出送院，好彩冇性命危險咋。
因乜事幹升降機一次又一次玩跳樓嘅呢？香港電梯業總工會理事長謝景華曾經講過，升降機問題同香港冇訂立適當嘅「人機比例」有關。簡單咁講，太少嘅維修員同太多嘅升降機唔成比例，有工友一日返工九個鐘，必須負責維修七至八部機，平均每部只有一粒鐘咁大把，根本唔夠時間深入檢查。謝景華話呀，過往多次向機電署反映，希望正式訂立合理嘅人機比例，但始終不獲接納。
維修保養人手不足，好容易就會睇漏眼o架啦，試過有升降機斷纜直墮升降機槽底，嗰種死神來了嘅感覺同墮落十八層地獄唔係差好遠o架咋。業內人士指出，人手不足嘅部分原因係投標價低者得。有升降機承辦商以極低價錢投標，成功之後就縮減人手以節省成本，結果工友做到七手八腳一頭煙都睇唔晒咁多部升降機。
即係咁，富昌邨今次墮升降機嘅具體原因有待調查，不過整體嘅核心問題係維修保養缺乏足夠人手以及有效監管，如果機電署願意接納意見，規定維修員同升降機要有一定比例，升降機就唔會餐餐淪為跳樓機啦！
功夫茶勸機電署各位老爺奶奶千祈唔好再失守，必須認真做好監管工作，否則下次輪到署方官僚誤墮跳樓機陷阱，未必有死過翻生嘅機會o架！