政情：廢腑之言：卿姐空談「八黨共識」遭寸爆
新政府開局至今，行政立法關係一直陷於僵局，行政會議召集人林煥光（WK）尋日出席民主黨劉慧卿（卿姐）主持嘅網台節目，卿姐重提多年前嘅立法會「八黨共識」，話政府自恃行政主導唔肯同立法會合作，隨即就畀WK反寸佢唔熟書。
WK：談何容易
卿姐話，十年前淘大花園爆發沙士病毒，政府一直歎慢板，但立法會八個黨派開會達成共識，促請政府即時隔離淘大居民。佢又話如果政府做困難決定前先諮詢政黨，政黨一定會願意承擔。
聽到卿姐將「八黨共識」講到可以解決一切問題，林煥光即時用「八黨當年何來有共識」一句寸爆卿姐，話當年八黨只可以喺少數反政府議題上達成共識，如今八黨變十二黨，再講要達成共識真係談何容易。
WK又以擴建堆填區為例，話就算環境局局長黃錦星出到「垃圾圍城」呢啲嚴重字眼，立法會仍然不為所動，但如果各政黨肯坐低慢慢討論，相信黃錦星一定願意廿四小時奉陪。