政情：有相為證：訪英各有伴
立法會議員梁繼昌（Kenneth）同葛珮帆（EQ）前日代表立法會出發前往倫敦，出席由威斯敏特議會舉行、為期十日嘅國際議會常規及程序研討會。
Kenneth年輕時曾經喺英國生活，佢話知道自己要去英國，一早已經約好幾個住喺英國啲舊朋友出嚟食晚餐。Kenneth約舊朋友呢招雖然合情合理，不過就始終唔及EQ帶埋老公去開會咁搶鏡。
EQ話老公係土木工程師，兩人平日做嘢好忙，自己夜晚又不時要開會，根本冇時間同老公坐低好好咁食餐飯，所以老公今次索性請大假陪埋EQ去英國，咁兩人就有機會日日一齊撐枱腳食晚飯。