政情：收料站：林新強多計套料摸杯底

律師會會長林新強（Ambrose）履新後尋日同傳媒午宴，呢位新任會長認真勇猛，不但帶埋貓紙有備而來交代來年大計，就連新鮮熱辣的美國中情局前特務斯諾登事件，同埋「佔領中環」，即使蜻蜓點水都要講番兩嘴，仲一坐低就叫侍應攞啲酒水招呼在座各位添！

專業嘅記者為時刻保持清醒當然婉拒盛情款待，不過Ambrose話，有時同律師會會員都會摸吓杯底輕鬆吓，不過就唔係把酒當歌，而係趁對方放鬆心情嘅時候，盡套會員投訴。

其實律師會為咗攞個酒牌，都搞咗幾年咁長，Ambrose無話係唔係喺律師會嘅酒吧套會員料，不過原來當年咁辛苦搞個酒吧，係有個咁神秘嘅原因。

Ambrose上任會長唔夠一個月，有好多大計，佢尋日公布咗啲法律及仲裁服務喺前海嘅「突破性」進展。

另外，律師會亦已聯絡清華大學同深圳市律師協會籌辦法律學院，並由律師會主責設計課程，最理想下學年可以開班。