政情：酒吧玻璃樽太多 邱榮光唔敢回收
政府早前計劃實施玻璃樽徵費，有「環保博士」之稱嘅大埔區議員邱榮光都好贊成，認為咁做可以間接推動玻璃樽循環再造。身兼大埔環保會總監嘅邱榮光，本身喺大埔區都設有塑膠回收棧，兼回收小量玻璃樽，可惜回收棧面積太細，又顧及回收成本問題，每月只能收幾百公斤玻璃樽。佢笑言，唔敢主動向酒吧食肆提出回收玻璃酒樽，否則啲玻璃樽肯定多到要落閘拒收。
冀政府徵費助減棄置
邱榮光話，雖然玻璃樽用途廣泛，但最好當然係將飲品樽回收循環再用啦，即係好似回到以前飲維他奶按樽嘅年代，省卻玻璃加工嘅成本，亦避免廢物回收後仍然係廢物嘅機會。不過，佢話依家回收再造玻璃樽嘅成本仲貴過製造一個新樽，所以好多廠商都放棄回收，棄置玻璃樽於是愈來愈多，直接增加垃圾堆填區負擔。佢希望政府加快實施玻璃樽徵費以減少棄置，雖然回收成本或會轉嫁消費者，但相信商界會識得諗辦法應對成本上漲，例如改用鋁罐。