政情：黃國健「狼叫」嚇親人
唔少人都選用自己喜歡嘅歌曲做手機鈴聲，不過工聯會立法會議員黃國健（KK）就揀咗與別不同嘅手機鈴聲。日前佢以嘉賓身份出席一個活動時，忘記將手機轉做震機模式，儀式進行期間，佢袋喺西裝褸嘅手機忽然響起「呀嗚」一聲清脆嘅狼叫聲，當堂嚇親身邊嘅人，佢自己都有啲唔好意思，拿拿聲拎部電話出嚟熄咗佢。
聽唔到一般鈴聲
KK事後解釋，用狼叫做鈴聲係有原因嘅，皆因佢聽覺不嬲都唔多敏銳，曾經用過英文歌同純音樂做鈴聲，都嫌旋律太過柔和，以致好多時手機響咗都聽唔到，錯過咗唔少重要嘅來電。雖然佢嘅手機有秘書台服務，來不及接聽嘅電話會自動飛線過去，但成日唔接聽電話，感覺上始終唔多好。
KK於是搜尋手機嘅內置鈴聲，揀嚟揀去，最後選咗最能夠警醒佢嘅狼叫聲，自此再冇聽唔到電話響，除咗喺議會進行期間，先至轉用震機模式。但亦由於狼叫鈴聲好響亮，佢經常都畀人投訴個鈴聲嚇破膽，所以KK話，遲吓都打算轉鈴聲，不過未諗到轉乜好喎。唔知KK會否考慮轉用立法會召集返回會議廳嘅鐘聲呢？