政情：貪曾冇人理 晚宴(火羅)爆偷走
貪曾前特首曾蔭權爵士好耐無蒲頭，尋日有個左派組織舉行周年晚宴，貪曾可能見有着數，所以現身獻世。不過佢本來應承主辦單位食埋飯先走人，但佢又突然改變主意，搞到主辦單位失晒預算，既要臨時臨急抽起佢喺筵席上嘅名牌，又要安排其他人坐佢個位，貪曾今次有飯都唔食，一定有好充分嘅理由，其實咪就係因為佢喺現場備受冷落，所以頂唔順要走先囉。
貪曾難得出席公開場合，傳媒當然好多嘢要問佢啦，大家最關心莫過於廉政公署有無搵佢協助調查，不過佢依然闊佬懶理，皮笑肉不笑咁就入咗會場。到主人家頒獎時，貪曾好無禮貌，佢坐喺台上一味掛住篤自己部手機，完全唔將主人家放在眼內。
「木嘴」示人 祝酒被冷待
到其他人致詞時，貪曾又「木嘴」示人，但一到影合照時刻，就即時變臉笑笑口，演技一流。由於佢唔畀面人，人哋當然都唔畀面佢啦，當大家祝酒時，企喺最前排嘅貪曾就無人騷佢，台上幾十人得兩三人行埋去同佢碰杯，佢自己亦好無癮，惟有當手上香檳係茅台一飲而盡，最尾仲要唔通知主辦單位下鬼祟離開，仲點食得落飯？