政情：7‧1折慶抗遊行

對於活動啟動禮擺明同遊行打對台呢個講法，各界慶典委員會主席鄭耀棠就話，因為添馬公園喺正七一至交場，搭台搭得嚟都下晝喇，真係信不信由你。

龜苓膏優惠 幫港人下火？

我哋上網睇過張商舖優惠清單，發現有一百六十間店舖有優惠。但睇真啲至知，原來有八十二間係龜苓膏專門店「海天堂」，唔通連建制派都感覺到香港人好火滾好熱氣，所以要七一食龜苓膏下火？

如果唔食龜苓膏，都有其他店舖提供優惠嘅，有幾間酒樓講明下午茶五折優惠。有專賣瓜子嘅店舖就提供瓜子、花生五折，但限定兩點至五點。如果唔想食嘢，去買嘢都得，十間米蘭站提供買二手名牌手袋優惠，最高去到八五折，但唔係間間咁慷慨，有間賣電腦產品嘅舖頭大派一千張現金券，不過每張十蚊雞，真係多謝晒囉。

今次呢個七一大特賣沒有最騎呢，只有更騎呢，尖沙咀一間心理輔導公司提供全日九折優惠，如果心理正常，可以去皇室水療揼骨都有九折。但最估你唔到，係連買樓都有得平。無錯，北角一間地產代理講明七一當日買樓免佣，都算大手筆喇——講緊嘅係買樓嗰個呀。

網民腦筋轉得快，已經策劃好一條遊行路線，一面遊行，一面喺銅鑼灣、灣仔同金鐘享用呢啲優惠，一於食得唔好嘥。

雖然提供優惠嘅店舖都幾多元化，不過聽聞唔少零售界人士都覺得今次行動政治味道太重，擔心會有反效果，所以好多出名連鎖店都無加入今次大特賣行動。睇嚟建制派仲未明白一個道理，就係「唔怕神一樣嘅對手，只怕豬一樣嘅隊友」，呢次騎呢大特賣，究竟係倒米定幫手，好快就揭盅。

此外，七一有石崗、新圍同昂船洲三個解放軍軍營開放，市民可以喺嚟緊星期日上午八點半至十二點半，喺六個地點攞門券。