中環出更：吳宏斌力撐 陳詠梅繼續快樂

早前香港中小型企業總商會舉行周年活動，卓妮見到商會榮譽會長兼基金主席吳宏斌（Dennis），第一時間關心Helen近況，唔知佢仲係咪提升快樂指數基金總幹事呢？Dennis不假思索咁話：「梗係喇！」跟住一輪嘴力撐Helen與件事冇關，話難為佢仲繼續不收分文為基金奔走，勇敢面對唔逃避，作為好友一定支持佢。貪湯被揭出席半官式活動拉埋Helen一齊去，唔關Helen事，當然就關貪湯事喇。

同場嘅基金主席兼「家電大老」陳國民，口徑同Dennis一樣。佢話最近香港人愈嚟愈唔快樂，基金要加把勁做多啲嘢至得。Dennis就預告，下月五日基金將頒發「開心工作間」標誌畀良心僱主，到時Helen都會出席，仲叫卓妮去睇吓添。

王淑筠（左）獲金融才俊老公高福辰（右）現身打氣。

吳宏斌（左二）出面招呼朱曦（中）及孫至誠（左一），對台灣支持中小企嘅政策讚不絕口。右起為馮洪章及劉展灝。（溫國佳攝）

商會周年 名人齊支持

講番當晚商會活動，齊去趁熱鬧嘅政商界名人仲有工業總會副主席劉展灝、中國企業協會總裁馮洪章、中華出入口商會會長莊成鑫等人，台北經濟文化辦事處處長朱曦及遠東貿易中心主任孫至誠亦去捧場，事關新任會長吳家榮係台灣女婿。卓妮仲見到曬黑咗嘅「朱古力公主」王淑筠（Diana），佢係商會零售品牌委員會主席，一向低調嘅Diana老公高福辰亦難得現身，為愛妻打氣。

卓妮