中環出更：與妻女逛街唐唐陪睇
全國政協常委唐英年（Henry）同太太郭妤淺雖受大宅僭建官司纏身，卻無損天倫樂心情，尋日大好星期天，照樣行街Shopping。Henry翹埋雙手，陪住生得亭亭玉立嘅千金一口氣掃完韓國護膚品，再掃美國品牌護膚品，囡囡最後出動雙手合十呢招，求老竇「科水」，最終係唐太心軟，由得囡囡任買唔嬲。
尋日下晝三點半，Henry拖埋太太及囡囡，一行三人現身金鐘廊Shopping。Henry外披灰色風褸襯恤衫，一身休閒打扮；囡囡就穿上時下後生仔最愛嘅牛仔短褲，大晒長腿。
愛女求「科水」 唐太幫口
拎住一袋韓國護膚品嘅唐小姐，行到去一個美國護膚品專櫃時好雀躍，拎起一瓶面膜左睇右睇，又細心聽售貨員介紹。妻女興致勃勃，Henry就全程翹埋雙手，有少許唔耐煩係理所當然，佢眼尾見到有專賣男士護膚品嘅貨架，好奇望多兩眼，但見售貨員一個箭步上前推銷，佢都一於唔買。
反而囡囡搵得心頭好，想扑錘買幾件護膚品扮靚，不過父母先係「財政大臣」，唐小姐馬上雙手合十，苦苦哀求老竇畀錢，Henry似乎懶理，繼續翹埋手，示意囡囡問過媽咪先。都係媽咪好人，佢見囡囡咁恨買，笑瞇瞇幫口叫老公畀錢。母女夾攻，最後當然得米啦。
大出血後，Henry嘅指定行程，當然又係飲咖啡，每人喺附近咖啡店買一杯外賣咖啡，就打道回府喇。
卓妮