中環出更：「貴氣」文物 游錦榮愛藏
中國文物近年被炒至「癲價」，吸引港人投資當中。香港山西商會副會長兼智道總會主席游錦榮（Anthony），將收藏嗜好變成一門生意。佢話，愈來愈多富豪愛珍藏文物博升值，更有人睇準王族文物具有「帝王之氣」，出價過億元，只為一親「王氣」。
捧乾隆琺瑯彩 緊張冒汗
從事製衣生意逾廿年嘅Anthony，去年與香港青聯前副主席李永康喺深圳開設中國首間民企文物公司，其中一件國寶級藏品，係明朝正統年間三幅放在皇家寺廟供奉嘅佛教壁畫，當中畫工精細超凡，全球稀有，吸引富豪北上「朝聖」，更有人一拋天價五億港元，欲據為己有。但Anthony話，國寶級文物，僅可觀賞，唔賣得。
文物係咪有「王氣」，真係見仁見智嘞。不過，愛收藏清朝之瓷器嘅Anthony相信，珍稀文物，既有「貴氣」，也有「雅氣」，當中蘊含歷代帝王的喜愛和生活習慣，故事引人入勝。到底邊類古董瓷器最受富豪歡迎？原來首選係康熙、雍正及乾隆年間嘅珍品。好似一個如手掌般大嘅乾隆年間霽藍釉描金琺瑯彩十八羅漢水注，身價高逾億港元，Anthony將佢捧喺掌心供貴客鑑賞，緊張手心冒汗，笑言跣手打爛咗，賣身都唔掂喎。