政情：畀人照肺？張華峰大舊石轉軚

石心情麻麻 連會都唔開

自由黨本來以為今日喺內務委員會有機會通過特權法動議，就算去到大會要分組點票，該黨亦評估只係欠兩至三票。點知尋日下午後形勢逆轉，本身支持佢哋建制派議員逐個跳船，以工商界為主嘅經民聯主席梁君彥講明，除咗佢自己因為內會主席身份唔方便投票外，聯盟其餘五票都會反對田少，當然包括地產及建造界石禮謙（大舊石）啦！至於本身話要幫金融經紀出一口氣嘅金融服務界張華峰，聽聞到尋晚都被迫妥協，唔敢企喺田少嗰邊。

據聞大舊石同張華峰本身都好想支持田少狙擊商交所，大舊石仲話自己一向本住良心講說話，但點解兩人會突然轉軚呢？聽聞佢哋尋日都無晒心機，因為聽完一位「曉以大義、明白事理」嘅高人指點後，即刻知道自己立場要投反對票。大舊石仲話因為心情麻麻，尋日寧願唔開政府帳目委員會，聽到都得啖笑。

功能界別亦反對動議

除咗兩人外，連前日唔肯表態嘅功能界別亦陸續歸邊，例如勞工界潘兆平同建築、測量及都市規劃界謝偉銓等，都話唔適宜喺證監會調查之際引用特權法調查，以免影響證監會調查進度，決定反對田少動議，令到支持田少嘅建制派得番謝偉俊一人，而廠商會林大輝尋日更加不知所終。計計條數，依家成個建制派只得六票支持，計埋廿七個泛民主派議員，共有三十三票，差一票才能通過，要泛民全部坐定定開會，睇嚟真係凍過水喇。

其實田少咁大膽主動出招，當然唔係空槍上陣，我哋聽聞佢收到風，證監會有高層想爆料脫身，上演「翻版葛輝事件」，但公開爆料實無命賠，所以先希望借田少引用特權法嘅法律效力做保護罩，然後狂爆政府內幕，但睇怕田少今鋪都係空手而回喇。