中環出更：「青」潔廣西盡享蠔情
最近好多社團都組團去廣西玩，上月底香港青年聯會都拉大隊到南寧及欽州考察三日，團員包括前主席陳仲尼、主席葉振都、常務副主席霍啟剛、副主席黃夢瑩（Monin）、鄭重科及彭芷君等，浩浩蕩蕩近五十人，相當熱鬧。
團員到鄉郊掃地執垃圾
Monin話，廣西係廣東水源嘅上游，但鄉村垃圾經常隨處擺放任由腐爛，長期污染土地及水源，所以此行佢哋趁機與小學生們到鄉郊掃地、執垃圾，齊齊響應「美麗廣西」嘅口號，算係為包括香港在內嘅下游居民食水安全出一份力。當日艷陽高照時，個個戴住草帽避暑，又戴住紅色領巾扮環保小先鋒，但眨吓眼又有驟雨，時雨時停幾個回合，搞到眾人勁狼狽。
Monin又話，此行最大驚喜係發現廣西盛產肥美嘅鮮蠔，當地仲有個「蠔情節」，大家盡情享受食法百變嘅當造肥蠔，大飽口福。鄭重科就話，廣西環境唔錯，食物口味亦同廣東差唔多，遲啲可以再深入啲去了解當地投資環境。