運輸署假電話老點市民
投訴電話有誤，運輸署被指「亂點」市民！長洲居民鄺小姐早前擬向運輸署投訴島內交通事務，遂按長洲碼頭告示上顯示的「交通投訴組」電話號碼撥打，未料電話竟然有誤，「我打去竟然係個外傭聽電話！政府真係離譜，畀個假號碼市民投訴都有？」鄺即時向區議員投訴，運輸署僅以黑膠袋包裹告示牌「遮醜」，遲遲未有交代或更新資料。
「政府做嘢真兒戲」
運輸署發言人承認，上址告示牌上的交通投訴組電話號碼有誤，至今已接獲三宗投訴，早前已將問題告示臨時遮蓋，並安排工務部門盡快更換。發言人並就提供錯誤訊息引致市民不便致歉，強調該署日後會留意同類告示資料。
「政府做嘢真係兒戲，咁嘅低級錯誤都犯得，仲要收到投訴都唔即刻更正，真係好離譜！」鄺小姐坦言不滿運輸署處事草率，即使接獲市民投訴後仍繼續「歎慢板」，有敷衍塞責之嫌，要求該署檢討。