隨《太陽報》附送及免費派發嘅《好報》又有猛料，大家每逢星期五千祈唔好錯過呀。最新一期嘅《好報》報道，香港中華基督教青年會YMCA竟然將烏溪沙青年新村放租，租畀浸會大學當作學生宿舍，簡直豬籠入水。
大家可能會問，YMCA飾演收租佬有乜嘢問題呢？好多業主都係靠收租牟利o架啦，將淺水灣兩個豪宅單位租畀行政會議成員張震遠嗰個富貴業主，每個月向震遠哥哥收租三十四萬元，三年就有超過一千萬落袋，不知幾鬼過癮呀。冇錯，正正常常將名下物業放租牟利係完全冇問題嘅，不過YMCA並唔係正常業主，而係一個極度唔正常嘅特殊租客，烏溪沙青年新村嘅真正業主係特區政府。
即係咁，烏溪沙青年新村以私人遊樂場契約形式獲得批地，現有契約喺九一年批出，YMCA只須繳付象徵式一萬六千元，就可以租用十一公頃土地，直到二○四七年，即係港人治港五十年不變嘅期限，平均每年租金唔夠三百元，月租廿零蚊咁大把。契約列明烏溪沙青年新村只係康樂營，不能變作商業或住宿用途。
好嘞，YMCA身為特殊租客，所交租金比起雞碎仲要濕濕碎，點解可以分租畀浸大嘅呢？浸大由一○年起租用烏溪沙青年新村其中一幢大樓，住客主要係內地學生，舊年再租多兩幢合共四十四個單位，分別係四人房同六人房。根據寄宿學生所講，每人每月交租約二千元，換言之浸大每年收租超過六百萬元，然後再交畀唔係業主嘅YMCA。
講到呢度，大家有冇一種有人搵政府笨嘅感覺？人哋以廉租優惠你，你一個屈尾十走去分租牟利，點講都唔通啦，難怪審計署都話關注。當然啦，即使有人存心搵笨，都要對方夠笨先至有機會成功。地政總署話喎，假如建基於YMCA提供嘅資料，佢哋嘅做法冇違反地契條款。官老爺唔知點解懵到上心口，麻煩審計署關注YMCA之餘，亦有必要關注一下地政總署，睇下佢哋因乜事幹笨得咁離奇，定係當中有乜嘢不可告人嘅左勾右結。
喂，學似立法會議員話齋，政府隻眼開隻眼閉，縱容唔係業主嘅YMCA出租營舍圖利，剝削香港人權益係唔啱o架。
最近香港刮起廉政風暴，一個前特首曾蔭權涉嫌貪腐，一個前司長許仕仁涉嫌貪腐，最諷刺嘅係連前廉政專員湯顯明都涉嫌貪腐。功夫茶絕對唔想見到，康樂營放租牟利而官老爺竟然放任不管，又係涉嫌貪腐囉。
唔好講咁多嘞，懇請審計署出手查一查，若然查到一陣腐臭味，廉署接力出手啦！