政情：廢腑之言：鬍鬚曾妄想做俠客

每個禮拜日定時發放笑彈嘅財政司司長曾俊華（鬍鬚曾）原來形象百變，繼聲稱自己係中產，平時鍾意飲咖啡同睇法國電影後，尋日又話自己好想做一個「俠客」，仲話俠客嘅氣概實在太有型。不過俠客生涯向來獨立獨行，唔通鬍鬚曾暗示自己做緊嘅工作無人認同？

鬍鬚曾細細個留學美國時已學習洪拳，話想做俠客，原來佢早前見番當年一齊習武嘅師兄弟，令佢回憶當年師公掛在嘴邊嘅金句，其中幾句係「家財萬貫金玉樓，不如一技在心頭。日間不怕人來借，夜間不怕賊來偷」。鬍鬚曾話呢種俠客心態型到爆，聽佢口氣，似乎佢好想過呢種俠客生活。

鬍鬚曾話，今個星期會公布發行新一期iBond嘅詳情，既然佢咁想做俠客，不如公布時嚟個「楚留香造型」，分分鐘可以吸引到師奶支持，或者令iBond大受歡迎呢？